TEMA 2. O Marco Común Europeo de Referencia para as Linguas.

Ola compañeiros/as! Hoxe gustaríame tratar o tema do MERCL, que xa ben coñecedes todos/as, relacionándoo coa miña propia experiencia a través da EOI (Escola Oficial de Idiomas). Como xa sabedes, O MERCL é unha ferramenta moi útil para as persoas que traballamos coas linguas. Na miña opinión, é fundamental poder contar cuns criterios de aprendizaxe e avaliación que nos permitan coñecer o noso nivel, e grazas a estos mellorar nos aspectos que percibimos que son nos que temos máis carencias. Mediante a detección destas “fallas” nalgunha área concreta poderemos escoller a mellor estratexia para traballar o que máis necesitemos.

Respecto a EOI (de Vigo) son alumna desta escola de idiomas desde hai sete anos. Cando me matriculei por primeira vez en inglés, fíxeno porque sempre foi unha lingua que me encantou. Malia poder acceder ao nivel B2 co título do Bacharelato, decidín comezar desde o nivel A1, é dicir desde o comezo, porque sentía a necesidade de facer un bo repaso do idioma. Este primeiro nivel, tras anos estudando este idioma no colexio e no teu tempo libre por afición, quizá non fose o máis ameno para algúns, pero tampouco tiven a sensación de aburrimento xa que a forma de impartir as clases era ben distinta en comparación ao que viña acostumada na escola. E quizá cursar este nivel non me serviu para adquirir novos coñecementos pero no seguinte curso, A2, foi cando comecei a “refrescar” certos aspectos como, por exemplo, os gramaticais que ás veces deixamos un pouco abandonados por ser de nivel básico, e considerar que non son tan necesarios, pero que en realidade son a base para o dominio dunha lingua estranxeira.

Cando comecei os meus estudos na EOI, chegar ao nivel máis alto de inglés implicaba estar no centro seis anos. Seis cursos en total que se repartían desde o nivel básico (dous cursos) ata avanzado (dous cursos), pasando polo nivel intermedio (dous cursos). Agora esta situación experimentou os cambios que podemos comprobar no MERCL e que dividiu cada curso (xa composto por dous) de intermedio e avanzado en dous, ademais da recente incorporación do nivel C2 co que antes non contabamos no centro. Realmente non quero dicir que estea a favor nin en contra porque, no meu caso, a asistencia a estas clases sempre foron de forma voluntaria e por interese a respecto da mellora do idioma. Por unha banda considero positivo que se poida dedicar máis tempo na aprendizaxe dunha lingua xa que non é algo que se aprenda sen práctica constante. E por outra, e co que non estou moi de acordo, ao igual que mencionei na anterior entrada, son bastante crítica cos continuos cambios na educación que non permiten que sexa algo estábel. Quizá vexo máis aspectos bos que malos respecto a esta ampliación, pero espero que non estean a cambiar cada pouco tempo. Sei que hai moita xente que necesita máis “inmediatez” na obtención do título, na maioría dos casos por temas laborais, pero isto ten solución xa que contamos con medios que nos permiten adquirir estes certificados coma, por exemplo, o TOEFL, First, Cambridge, IELTS etc. 

Por último, gustaríame, agora si, postularme a favor e en contra de dous aspectos característicos da EOI. Gústame a forma en que se imparten os contidos, isto é, respéctanse os obxectivos e contidos que se deben abarcar en cada idioma, e considero que a forma en que se tratan as catro destrezas (speakinge writingna parte de produción, e listening e reading na parte de comprensión) resulta moi eficaz e se axusta ás directrices do MERCL. O que non me parece moi correcto é que as certificacións que se obteñen na EOI non teñan validez fóra do noso país. Estamos ante unha ensinanza de réxime especial pero que é de carácter oficial e que se axusta á normativa do MERCL a respecto da división de niveis e correspondentes criterios de avalición e dominio do idioma. É por iso que, desde o meu punto de vista, considero necesario un cambio neste aspecto para que a acreditación do nivel que se obtén na EOI teña a mesma validez que calquera outra proba coma as que puxen máis arriba de exemplo (TOEFL, First...).

En definitiva, é necesaria a función que cumpre o MERCL a nivel individual respecto ao alumnado e tamén de forma colectiva para que todos sexamos avaliados da mesma forma e seguindo as mesmas pautas. Por iso, considero que nas EOI realízase un moi labor tanto no proceso de ensinanza coma no proceso que debemos superar para a acreditación do noso nivel.