TEMA 5: Deseño Curricular (Dossier)

Bo día compañeiros/as! Hoxe gustaríame compartir con vos, nesta entrada Dossier, a experiencia da sesión dos días 25/11 e 09/12. Nesta ocasión, traballamos o Tema 5: Deseño Curricular, co profesor Gonzalo Constenla.

A primeira actividade que fixemos foi unha posta en común dos coñecementos sobre o Currículo na ESO, FP e Bacharelato. O profesor realizou unha serie de preguntas relacionadas con este tema e sobre as que debíamos realizar unha movilización destes aspectos que xa tratamos, de forma breve, na materia de Deseño Curricular. O máis curioso resultou a forma en que tiñamos que traballar, primeiro en grupos de dúas persoas, despois de catro e seis, e así ata terminar todos na aula facendo as nosas aportacións sobre a materia. Penso que foi moi interesante esta forma de traballar, por unha parte, dinme de conta que necesitaba “refrescar” certos aspectos do currículo. Por outra banda, o feito de comezar con grupos reducidos e ir ampliando, fai que cada un de nós pense e se esforce en recordar información para compartir cos demais e, a medida que imos aumentando os compoñentes do grupo, xorden novas aportacións e mesmo podemos autocorrixirnos en caso de descubrir que a nosa resposta previa non era a máis axeitada, ou que se nos esquecera engadir outros datos.

A seguinte tarefa coa que traballamos na aula realízouse a través dunha ferramenta innovadora chamada Kahoot! Esta consistía nunha serie de preguntas sobre os contidos do currículo a respecto da LOMCE, Lei Orgánica para a Mellora da Calidade Educativa, e sobre quen se encarga de tomar as decisóns de acordo a estes contidos como, por exemplo, as horas ás que se lles deben dedicar a certas materias, entre outras cuestións. Entre as posibilidades que tiñamos para responder atopamos o Goberno, as Autonomías, o Ministerio de Educación e os Centros. A verdade, serviunos para descubrir que non tiñamos moito control nestes temas, tamén a situación contra o reloxo non axudaba, ademais de sorprendernos as competencias que tiñan nalgúns aspectos o Goberno e outros onde non tiñan nada que ver.

Tras esta actividade, o profesor dividiu de novo a clase en grupos para que cada un traballase cunha área relacionada coas Linguas Estranxeiras (na ESO, Bacharelato e FP) na LOMCE. No meu grupo tivemos que traballar cos apartados sobre Características Xerais da Avaliación das Linguas Estranxeiras da ESO na LOMCE e cos Principios e Obxectivos xerais do Bacharelato. A parte da exposición realizamola na sesión do día nove, e cada grupo tivo que facer unha presentación coa información recabada. Tras a posta en común da información recompilada destes apartados asignados, fixemos unha avaliación ou feedback entre os/as compañeiros/as, na que se valoraba de maneira formativa a correspondente exposición de cada grupo.

Para concluír, gustaríame facer unha valoración sobre a metodoloxía empregada nesta sesión a respecto destas tarefas. Na miña opinión, considero moi positiva esta forma de traballar, ao xuntarnos en grupos podemos compartir ideas e aprender nova información relacionada coa materia. Alén disto, a ferramenta Kahoot! pareceume unha moi boa forma de captar a atención do alumnado e motivalo para que se implique no proceso Ensinanza-Aprendizaxe. E vos, que pensades? Lémonos!