Aprendizaxe Baseada en Proxectos (Inspirado na presentación de Noemí Soto Estévez)

Benvidos/as un día máis ao meu blog! Esta nova entrada está relacionada coa presentación da nosa compañeira Noemí: Aprendizaxe Baseada en Proxectos. Tamén atopei interesante este modelo de pedagoxía constructivista, que promove a aprendizaxe a través da estimulación do alumnado. 

A Aprendizaxe Baseada en Proyectos (Project-Based Learning) é un método que lle facilita ao alumnado a adquisición de coñecementos e competencias a través da creación de proxectos para resolver situacións da vida real. O alumnado desenvolve a súa autonomía mediante a creación da súa propia aprendizaxe. O profesorado encárgase só de guiar ao estudantado e este debe planificar e elaborar o traballo encomendado. Desta forma, ademais da autonomía, foméntase a creatividade para a resolución de problemas ou retos que van xurdindo na creación da tarefa. Este método está baseado no enfoque constructivista, é dicir, a través do traballo en equipo fomentamos a aprendizaxe social. Mediante as teorías, o alumnado é quen leva as tarefas á práctica, a través do desenvolvemento dun proxecto que se relaciona cun tema de interese. É un modelo enfocado a todos os niveis educativos, a súa intención é preparar aos/ás estudantes para a presente sociedade mediante o seu desenvolvemento profesional e persoal.

Os obxectivos deste método son diversos: mobilizar os coñecementos que xa foron adquiridos, examinar con detemento os coñecementos e contidos, desenvolver o pensamento crítico, a análise e resolución de problemas, escoller recursos de aprendizaxe, utilizar de forma axeitada as TIC, seleccionar a información, facerse cargo de certas responsabilidades, formar parte dos debates e asumir a responsabilidade do proceso de aprendizaxe. 

Como en calquera método de Ensinanza-Aprendizaxe existen aspectos positivos e negativos. Entre os positivos destacan a preparación para o seu futuro laboral, o aumento da motivación, a relación entre a aprendizaxe coa realidade, as habilidades sociais e de comunicación, a mellora da comprensión lectora e análise crítica, e o aumento da autoestima. Por outra banda, entre os aspectos negativos atopamos a complexidade que caracteriza a este modelo, a falta de compromiso e tempo, e a gran cantidade de traballo que supón.

Na miña opinión, este método de aprendizaxe resulta moi enriquecedor xa que, a través desta metodoloxía, o alumnado non só memoriza ou recopila información, senón que aprende facendo. Ademais, debido ao interese que lle pode provocar o contido, a miúdo relacionado coa súa realidade, este método capta a atención do alumnado porque o asocia ao cercano e é importante no seu mundo. Porén, a falta de tempo en numerosas ocasións provoca que non sempre sexa viábel traballar con este modelo.